Околу прашањето за екстернализација на обработката на барањата за азил, во Европската Унија сè повеќе се формира консензус, изјави хрватскиот министер за внатрешни работи Давор Божиновиќ.
„Тоа станува прашање околу кое се раѓа консензус“, изјави Божиновиќ по разговорот со новиот комесар за внатрешни работи и миграција, Магнус Брунер.
ЕУ бара иновативни решенија за управување со миграцијата и, меѓу другото, постои идеја за испраќање баратели на азил чие барање е одбиено во прифатни центри надвор од ЕУ, од каде би чекале да бидат вратени во земјите од каде потекнуваат.
Божиновиќ рече дека на новиот комесар му рекол дека пред пет години и предложил решение во оваа насока на неговата претходничка, поранешната комесарка Илва Јохансон и дека тогаш немало слух за тоа.
„Мојата идеја беше административните процедури да се префрлат таму од каде што доаѓаат мигрантите, бидејќи е многу попрактично и похумано на некој што нема право на меѓународна заштита во ЕУ да му се каже ова во неговата земја, отколку кога тој веќе пристигна во Европа, што потоа создава низа проблеми“, рече Божиновиќ.
„Затоа, сигурен сум дека на крајот ова прашање ќе биде сфатено максимално сериозно и Хрватска ќе инсистира на тоа бидејќи е подобро, попрактично и похумано“, рече вицепремиерот и министер за внатрешни работи.
Во разговорот со Брунер се зборуваше и за можен нов предлог за директива за враќање на илегалните мигранти.
„Враќањето е едно од најважните прашања и нешто мора да почне да се применува во пракса“, вели Божиновиќ, додавајќи дека во тоа поголема улога треба да има Европската агенција за гранична и крајбрежна стража (Фронтекс).
„Нашето мислење е дека Фронтекс треба повеќе да биде на терен и да се занимава со конкретни решенија за оние аспекти од мигрантската криза кои најмногу ја оптоваруваат Европа, а еден од нив секако е враќањето на илегалните мигранти“, рече тој.
Во 2019 година, земјите-членки постигнаа договор за предлогот за директива за враќање на илегалните мигранти, додека Европскиот парламент сè уште не го дефинираше својот став за тоа. Сепак, мнозинството земји-членки денеска сметаат дека договорот од пред пет години е застарен и дека Европската комисија треба да излезе со нов предлог.
Во октомври, Австрија и Холандија подготвија нон-пејпер, кој беше поддржан од 15 други земји-членки на Шенген зоната, вклучително и Хрватска, и бара од Комисијата нов законски предлог за поефективно враќање на илегалните мигранти.
Божиновиќ е првиот министер за внатрешни работи кој го прими новиот комесар Брунер, до неодамна австриски министер за финансии.
