Високиот претставник на ЕУ за надворешна политика и безбедност Жозеп Борел денеска изјави дека Унијата ќе ѝ обезбеди на Украина дополнителни 500 милиони евра воена поддршка и дека е убеден дека во наредните денови може да се постигне договор за ембарго на руската нафта.
Обраќајќи им се на новинарите на маргините на состанокот на министрите за надворешни работи на Г7 во северна Германија, Борел рече дека воената поддршка ќе биде за тешко вооружување како тенкови и артилерија и дека помошта на блокот ќе се зголеми на околу 2 милијарди евра.
„Нов поттик за воена поддршка. (Ќе има) поголем притисок врз Русија преку економски санкции и континуирана меѓународна изолација на Русија и сузбивање на дезинформациите“, рече тој.
Оптимист за европското ембарго на руската нафта
Борел рече дека е исто така оптимист дека ембаргото на ЕУ за руската нафта може да биде договорено во наредните денови.
„Сигурен сум дека ќе имаме договор. Ни треба и ќе го имаме. Треба да се ослободиме од зависноста од нафта од Русија“, рече тој.
„Ако нема договор на амбасадорско ниво, тогаш во понеделник кога ќе се соберат министрите мора да дадат политички импулс“, рече тој.
