Европската Унија е подготвена да воведе царини на челик, во случај на нагло зголемување на увозот, со цел да ги заштити европските произведувачи од секундарните последици на американските царини, објави Европската Комисија.
Најновите статистички податоци покажуваат дека увозот на челични производи во ЕУ, порасна после американското воведување на 25-отстотни царини на увоз на оваа сировина, истакнаа од Комисијата, после темелна анализа на трговијата во изминативе неколку години.
„Врз основа на досегашните резултати од истрагата, Комисијата смета дека е оправдано воведување на провизорни царини“, стои во соопштението на Европската Комисија.
Истрагата опфати 28 категории на челик и производи од челик, за да се потврди влијанието на променетите услови на пазарот. При започнувањето на истрагата, Комисијата истакна дека извозот на тие производи е зголемен на 30,6 милиони тони во 2017 година, односно за 11,8 милиони во споредба со 2013 година.
Истрагата се уште не е завршена
Истрагата не е довршена, но ЕУ според меѓународните трговски прописи може да воведе „привремени заштитни“ царини во период до 200 дена, ако заклучи дека зголемениот извоз предизвикал, или би предизвикал сериозни штети во домашниот сектор за челикот.
Од Комисијата денеска порачаа дека будно го следат и увозот на алуминиум во Европа, со цел да бидат преземени адекватни мерки, ако се укаже потреба за интервенција во тој сектор.
ЕУ исто така воведе царини на увозот од САД вреден 2,8 милијарди евра, вклучувајќи производи како бурбон и мотоцикли.
Кон почетокот на јуни започната е и жалбена постапка против САД пред Светската трговска организација, стои во денешното соопштение на Комисијата.