Европската Унија планира со шестиот пакет санкции да ја опфати и Алина Кабаева, за која се наведува дека е љубовница на рускиот претседател Владимир Путин.
Извори блиски до Guardian изјавија дека ЕУ предложила санкции за Кабаева, поранешна олимписка гимнастичарка за чие појавување на нацрт листата на санкции прв извести Bloomberg. Кабаева е една од десетиците кои ќе се соочат со санкции – конкретно со забрана за патување во ЕУ и замрзнување на имотот.
Според Bloomberg и Guardian, Кабаева се опишува како „блиско поврзана со претседателот Владимир Путин“.
Кабаева освои злато на Олимписките игри во 2004 година за ритмичка гимнастика. Шест години ја претставуваше партијата на Путин, Единствена Русија, а потоа водеше голема медиумска група поврзана со Кремљ, иако немаше никакво искуство со медиуми.
Во 2008 година локален весник во Москва објави дека Путин тајно се развел од сопругата и планира да се ожени со гимнастичарката. Кремљ остро ја демантираше приказната и набргу истата беше затворена.
Wall Street Journal минатиот месец објави дека американската администрација се откажа од санкции кон Кабаева поради загриженост дека Путин тоа би го сметал за личен напад. Но, Белата куќа остро го демантираше тврдењето, инсистирајќи дека никој нема да биде поштеден од санкции, доколку го заслужува тоа.