Станарите на пет згради во северниот дел на Лондон синоќа биле евакуирани по налог на локалните власти поради опасност од пожар и итни градежни зафати за поставување на противпожарна заштита.
Девет дена по пожарот во зградата Гренфел во кој загинаа 79 луѓе, властите на лондонскиот кварт Камден синоќа пред полноќ соопштиле дека ќе бидат евакуирани 800 станови во пет згради.
Фасадите на тие згради се исти како кај „Гренфел тауер“ која изгоре ноќта меѓу 13 и 14 јуни.
„Евакуацијата ќе биде итно спроведена затоа што не знаеме дали можеме да бидеме сигурни дали станарите се безбедни“, изјавил синоќа Џорџ Гулд, претставник од локалната власт.
Според него, неодамнешниот пожар многу ја сменил ситуацијата и не смее да се ризикува.
Станарите биле пренесени во локални одморалишта и хотели, а градежните активности се очекува да траат три недели.
Итната евакуација следува по серија тестирања за заштита од пожари во тие згради чии резултати биле незадоволителни.
Британската полиција соопшти дека пожарот во „Гренфел тауер“ бил предизвикан од ладилник и дека не е намерно предизвикан. Зградата изгоре брзо затоа што при реновирањето бил вграден евтин, запаллив термо-изолациски материјал.
Во зградата живееле сиромашни луѓе, бегалци, приматели на социјална помош, кои со години се жалеле на проблеми со струјата и други недостатоци, поради што зградата лани била реновирана.