Британскиот тенисер Даниел Еванс упати остри зборови кон организаторите на Ролан Гарос по неговиот пораз во првото коло. Триесетгодишниот Еванс загуби од Јапонецот Кеи Нишикори во пет сета – 6:1, 1:6, 6:7 (3: 7), 6:1 и 4:6.
Според Еванс, причината за неговиот неуспех е студеното време во Париз и новите топчиња со кои се игра годинашниот Грен слем.
– Беше ладно. Дури ни на куче не би му дал да си игра со топчињата што ги користевме на теренот. Мислам дека овие топки се голема грешка. Во такво време, тешко е да се натераат да летаат во некој правец, изјави Еванс за Yahoo Sport.
Претходно, новите топчиња поради нивната тежина беа критикувани и од Рафаел Надал.