Србија ја совлада Турција во последниот натпревар од третото коло во Д групата, на Европското првенство во кошарка.
Србите, пред 12.000 гледачи во „Фенербахче арена“, во трилер завршница славеа над домаќинот со резултат 80:74. Србија од почетокот на мечот имаше предност, во втората четвртина и од 14 поени (27:13), а до средината на последниот период разликата се движеше помеѓу шест и десет поени.
Турците на шест минути до крајот со серија тројки само за момент преминаа во водство (55:56), а серијата на домаќинот ја запре Богдановиќ со две тројки во интервал од 15 секунди.
До крајот пресуди искуството и смиреноста на Србите, кои ги одбија сите напади на Турција за евентуален пресврт.
Богдановиќ со 17 поени (12 во последната четвртина) и Јовиќ со 15 поени, девет асистенции и четири скока ја предводеа Србија до втората победа на Европското првенство, додека кај Турција, која го запиша вториот пораз најефикасни беа Махмутоглу со 19 (5 тројки) и Осман со 15 поени.
Утре Србија ќе игра против Велика Британија, а Турција против Белгија.
Претходно во оваа група Русија со победата над Белгија 76:67 го задржа максималниот ефект, а Летонија со 97:92 ја победи Велика Британија.
Во Ц групата актуелниот шампион Шпанија продолжи да ги демолира своите противници. Шпанците, во Клуж, ја совладаа Романија со 91:50.
Хуан Ернангомез беше најефикасен кај Шпанците со 18 поени. Утре Шпанија за противник ќе ја има Хрватска која исто така нема пораз по првите три кола