Сѐ повеќе се зборува дека Евролигата би можела да брои 20 екипи од следната сезона. Како што пренесува порталот Eurohoops, ваквиот развој на настаните може да доведе до промена на форматот на натпреварувањето.
Новинарот Арис Баркас наведува дека раководството на Евролигата, предводено од Дејан Бодирога и Паулиус Мотејунас, на тимовите со А лиценца им претставило план за проширување на натпреварувањето на 20 екипи. Предлогот е тимовите да бидат поделени во две конференции (сѐ уште не се знае дали според географски критериуми), а во регуларната сезона секој клуб би одиграл по 28 натпревари.
Euroleague management presented its plan to the clubs/shareholders for an expansion to 20-team league. This comes with the option of changing the format to two conferences and a 28 games season. More coming on @Eurohoopsnet
— Aris Barkas (@arbarkas) February 11, 2025
Се претпоставува дека системот на натпреварување би бил следниов: секој тим ќе одигра 18 натпревари од регуларната сезона против тимови од својата конференција (дома-гости). Дополнително, секој тим би одиграл по еден натпревар против ривали од друга конференција, 5 дома и 5 на гости.
Ваквата промена би била значително полесна за организаторите и учесниците отколку да го остави стариот систем. Доколку форматот на лигата остане ист, тоа би значело дека тимовите од Евролигата ќе одиграат 38 натпревари во текот на регуларниот дел од сезоната, а бројот на т.н. двојни недели ќе се зголемат од 7 на 9.
Засега не се знае кој систем ќе биде усвоен, но сѐ поизвесно е дека ќе дојде до проширување на 20 клубови.
