Еден ден по изборите во Холандија, Европа може да здивне бидејќи победи партијата на либералниот премиер Марк Руте, а загуби десничарот Грет Вилдерс. Иако европските медиуми пишуваат дека Руте освои помалку мандати од претходно, мнозинството се сложуваат дека таквиот резултат е добар за Европа.
Народната партија за слобода и демократија - VVD, освои 33 места, додека десничарската и антиевропска Партија за слобода - PVV на Грет Вилдерс доби 20 од 150-те места во парламентот, објави BBC.
„Ова е важно бидејќи Холандија по Брегзит и американските избори кажа стоп за погрешниот вид на популизам“ - изјави Руте.
Европските претставници му ја честитаа победата на Руте, како победа на гласот против екстремизмот, а честитки доби и од Франција, Германија и од Брисел.
Според европски политичар, победата на партијата на Руте е враќање на здравиот разум, особено по Брегзит и победата на Доналд Трамп.
Европските медиуми заклучуваат дека ова е крај на опасноста Холандија да отпочне процедура за излегување од Европската унија по примерот на Британија и Брегзит.
