На вчерашните протести во Берлин организирани поради мерките на германската влада воведени за борба против коронавирусот, околу петстотини луѓе беа приведени по судирите со полицијата.
Илјадници луѓе се собраа во Берлин и покрај тоа што локалните власти забранија неколку различни протести организирани за викендот, вклучително и митингот на Querdenken, движење скептично за антикорона мерките на германската влада.
Берлинската полиција распореди околу 2.000 полицајци низ градот и имаше неколку судири со демонстрантите.
Претседателот на германскиот парламент Волфганг Шојбле во неделата остро го критикуваше движењето, повикувајќи ги луѓето да не се залажуваат со „евтини слогани“.
„Ако практично сите експерти ширум светот велат дека коронавирусот е опасен и дека вакцинацијата помага, тогаш кој има право да каже ‘Јас сум попаметен од тоа?’“ рече тој, истакнувајќи дека тоа е „неподнослив степен на ароганција“.
На собирот што првично го замисли иницијативата Querdenken присуствуваа 22.500 луѓе, но берлинската полиција го забрани собирот, како и неколку други.
Германската разузнавачка служба предупреди претходно дека движењето станува сѐ порадикално, ставајќи ги под надзор некои од неговите поддржувачи.
Илјадници луѓе протестираа во Франција против мерките на нивната влада три викенди по ред, а околу 80.000 луѓе протестираа во градовите низ Италија минатиот викенд.
На еден од протестите во Париз, полицијата употреби солзавец откако толпата почна да провоцира полицајци. Демонстрантите скандираа „Слобода! и фрлаа шишиња кон полицијата. Тие, исто така, извикуваа пароли „Диктатор – во затвор!“, „Макрон, не ни треба твојата пропусница!“
На 12 јули, францускиот претседател Емануел Макрон најави серија нови рестриктивни мерки за ограничување на ширењето на COVID-19. Меѓу другото, тој најави продолжување на практиката за користење санитарни пропусници, со кои се докажува вакцинација или негативен резултат од тестот за COVID-19, особено во барови, ресторани, возови на долги релации и авиони.