Регулаторната комисија на Европската унија реши да му изрече парична казна на Google во висина од 1,5 милијарди евра поради гушење и попречување на конкуренцијата во пазарот на дигитален маркетинг, каде Google и онака доминира. Ова е трета поголема парична казна која Google ја доби од ЕУ.
Последната истрага беше фокусирана околу бизнисот на Google наречен AdSense, преку кој компанијата поставува полиња за пребарување на веб-страници управувани од трети лица, како што се информативни портали и извори на вести.
Комисијата вели дека Google ја злоупотребил својата позиција за да може преку вештачки начин да го намали изборот и да ја „загуши иновацијата“ во начините на кои веб-страниците прикажуваат реклами од нивните ривали.
Минатата година Google доби рекордна казна од 4,3 милијарди долари поради користење на нивниот оперативен систем Android за блокирање на ривалите, а една година претходно беше казнет со 2,4 милијарди поради блокирање на ривалските компании кои имаат веб-страници за споредба на цени.
Европската комисија изјави дека компанијата Google го користела нејзиниот софтвер за да може на нефер начин да ја зголеми доминацијата на нивниот пребарувач и „им ја одземала можноста на европските корисници да уживаат во придобивките од фер и ефективна конкуренција“.