На европските берзи утринава цените на акциите паднаа четврти ден по ред, откако на крајот на минатата недела достигнаа рекордни нивоа.
Индексот STOXX 600 на водечките европски акции беше во минус од 0,1 отсто во 9:30 часот, слабеејќи четврти ден по ред, откако во петокот за прв пат во историјата се проби над 525 поени.
Истовремено, лондонскиот FTSE индекс зајакна за 0,05 отсто, на 8.270 поени, а франкфуртски DAX за 0,09 отсто, на 18.605 поени. Парискиот CAC, пак, ослабе за 0,17 отсто, на 7.488 поени. Внимателно се тргува и на азиските берзи. MSCI индексот на азиско-пацифичките акции, без Јапонија, беше речиси непроменет од вчера во 9:30 часот.
Во исто време, индексот Nikkei се лизна за 1,05 отсто на берзата во Токио, додека цените на акциите во Јужна Кореја и Хонгконг паднаа меѓу 0,2 и 0,4 отсто. Во Шангај и Австралија, пак, тие се зголемија меѓу 0,2 и 0,4 отсто.
Пазарите се обидуваат да се стабилизираат по остриот пад од претходниот ден, но инвеститорите се неизвесни, исто како вчера на Волстрит, кога индексот Dow Jones зајакна за 0,09 отсто, додека S&P 500 ослабе за 0,16, а индексот Nasdaq за 0,30 отсто .
По остриот пад од претходниот ден, технолошкиот сектор се стабилизира. Акциите на Microsoft, Alphabet, Apple, Amazon и Nvidia паднаа меѓу 0,1 и 1,7 отсто. Цената на Tesla, пак, се зголеми за повеќе од 4 отсто. Сите најнови податоци укажуваат дека растот на американската економија забавува, а пазарот на труд слабее.
Освен тоа, инфлаторните притисоци постепено се намалуваат, па инвеститорите се убедени дека американската централна банка ќе почне да ги намалува каматните стапки во септември, по повеќегодишна рестриктивна монетарна политика.
Затоа ниту новите изјави на шефот на ФЕД, кои навестуваат дека навистина доаѓа намалување на каматните стапки, не влијаат значително на насоката на пазарот. Имено, тоа намалување на каматите одамна е вградено во пазарните цени.
