Славниот италијански стратег Фабио Капело ги искритикува Лионел Меси и Кристијано Роналдо поради фактот што тие не се појавија на церемонијата на ФИФА на која се доделуваше наградата за Најдобар играч во светот.
Капитенот на репрезентацијата на Хрватска, Лука Модриќ, ја освои наградата за Најдобар играч во светот, а во најтесната конкуренција влегоа уште и Кристијано Роналдо и Мохамед Салах, кои завршија последователно втор и трет.
На синоќешната церемонија учествуваше скоро целиот светски фудбалски врв, со исклучок на двете главни ѕвезди на овој спорт – Лионел Меси и Кристијано Роналдо. Поради нивното отсуство, Фабио Капело упати сериозни критики во нивна насока.
„Фактот што ниту еден од нив двајца не се појави на церемонијата е доказ дека тие немаат никаква почит. На доделувањето на Оскари сите номинирани доаѓаат на церемонијата, без разлика дали ќе бидат наградени или не. Можеби тие двајца премногу пати ја добија оваа награда, па сега не сакаат да гледаат како ја губат“, изјави Капело.
Годинава за првпат по десет години наградата Играч на годината ја доби некој фудбалер кој не е Лионел Меси или Кристијано Роналдо. Двајцата поделија по 5 вакви награди во изминатите 10 години.
„Кога губиш мора да бидеш грациозен исто како кога победуваш“, додаде Капело.