Како награда за сите трауми кои ги преживуваат додека отстрануваат вознемирувачки и забранети содржини, Facebook најави дека на своите модератори ќе им исплати 52 милиони долари.
На овој начин ќе им помогнат на поранешните и на тековните модератори да ги надминат проблемите со менталното здравје, пишува The Verge.
Секој модератор ќе добие најмалку 1.000 долари, а се очекува и дополнителен надомест доколку им дијагностицираат пост-трауматичен стрес или некоја друга болест.
Судската одлука ќе опфати околу 11.250 модератори, а адвокатите сметаат дека дури половина од нив ќе имаат право на дополнителен приход.
„Драго ни е што Facebook соработува со нас и се согласува да им помогне на луѓето коишто имаат ужасно тешка работа. Штетата којашто може да се доживее на оваа работа е голема“, вели адвокатот Стив Вилијамс.
Модераторите на Facebook секој ден гледаат вознемирувачка содржина, па во иднина ќе имаат состаноци со психолози еднаш во неделата.
