Некои од најголемите компании во светот се здружија за да креираат сопствена криптовалута за која се надеваат дека еден ден ќе стане глобална валута што ќе прерасне во вистински ривал на американскиот долар. Името на криптовалутата е Libra, а неа ја лансира Facebook преку WhatsApp, Messenger и останатите апликации во кои може да се прават монетарни трансакции.
Libra е поддржана од 28 компании, меѓу кои и гиганти како PayPal, Mastercard и Visa, а нивната цел беше да креираат криптовалута која ќе ги реши проблемите на традиционалните валути, истовремено елиминирајќи ги препреките кои не му дозволија на биткоинот да се наметне како сериозно платежно средство.
„Технологијата направи сѐ да ни биде на дофат, освен парите. Скоро 1,7 милијарди луѓе немаа банкарски сметки. Тоа е скоро 31% од светската популација. А оние кои имаат банкарски сметки се жртви на бавниот систем на трансакција на средства“, се вели во најавата за Libra.
Дејвид Маркус од Facebook, кој го поттикна и започна развојот на Libra, вели дека мисијата на овој проект е да се креира „едноставна глобална валута и финансиска инфраструктура која ќе им даде поголема моќ на милијарди луѓе“. Неодамнешна анализа спроведена од британската компанија Luno тврди дека оваа криптовалута ќе ги пополни празнините помеѓу традиционалните глобални валути како доларот и криптовалутите како биткоин и Litecoin.
За разлика од биткоин, вредноста на Libra е врзана со неколку валути за да се спречат сериозни флуктуации какви што доживеа биткоин, што всушност и придонесе за краткотрајниот живот „на врвот“ за него.
„Libra ќе биде многу различна од биткоин во тој поглед, бидејќи е поврзана со цела група валути, што ќе резултира во поголема стабилност и елиминирање на непредвидливи и нагли флуктуации на вредноста. Поради тоа, таа ќе биде повеќе како традиционална валута отколку како фиктивен збир на вредности“, вели Гајлс Хокинс, партер во Ashfords Solicitors.
