Интернет

Facebook најави драстични промени кај Instagram и WhatsApp

30. април 2019 - 14:54 | К.З.

Само неколку часа нѐ делат од овогодинешната конференција F8, на која технолошкиот гигант Facebook ќе ја открие иднината на истоимената социјална мрежа. Покрај најочекуваните новости за Facebook, на конференцијата ќе добиеме нови информации и за „револуционерните промени“ за WhatsApp и Instagram.

Очекувањата се дека Facebook ќе објави новости за приватноста и енкрипцијата, откако во текот на изминатата година доби многу критики поради бројните пропусти, етичките и морални проблеми.

Иако веќе некое време прави обид да ја поправи својата репутација по аферата со Cambridge Analytica, компанијата и понатаму се наоѓа на мета на критики поради начинот на работа и скандалите кои излегоа на површина во последните 12 месеци. Facebook веќе најави промена во начинот на користење на личните податоци на корисниците, но останува да видиме што ќе биде официјалниот резултат на конференцијата F8.

Покрај тоа, се очекува дека компанијата ќе ги најави новите промени на комуникациските алатки на социјалните мрежи Facebook, Instagram и WhatsApp, кои во иднина би требало да бидат редизајнирани за да функционираат заедно како дел од промената на фокусот на компанијата Facebook.

На почетокот на оваа година извршниот директор на Facebook, Марк Закерберг, изјави дека „иднината на комуникацијата е во приватните, енкриптирани сервиси“. Тој најави дека Facebook работи на промена на комуникациските алатки на компанијата, со што би им се овозможило на корисниците да разменуваат пораки помеѓу WhatsApp, Facebook Messenger и Instagram.

Коментирај