Социјалната мрежа Facebook, која многумина ја критикуваа поради ширење лажни вести во текот на последните претседателски избори во САД, пронајде начин како да го реши овој проблем: почна да ги означува сите вести со сомнителна содржина.
Ваквото тагнување компанијата го најави во декември, 2016 година, а од сега секоја вест ќе биде проверувана од партнерски фирми што се занимаваат со контрола на вистинитост на содржините. Доколку најмалку две фирми утврдат лажна вест, ќе стои предупредување на почетната страна (news feed) под веста.
Ваквите вести Facebook нема директно да ги квалификува како лажни, туку ќе ги тагне како спорни. Означувањето е можно од страна на корисниците, но оваа опција се уште не е достапна во сите земји. Од компанијата наведуваат дека наскоро сите ќе можат да ја користат.
Новиот систем на корисниците ќе им олесни да означат објави што веројатно се лажни. Тие потоа ќе бидат прегледани од страна на фирми задолжени за тоа и доколку се утврди дека се потенцијлано лажни, ќе бидат означени како спорни, пишува Business Insider.
Кога Facebook беше поврзан со објавување непроверени информации во врска со американските претседателски избори, основачот Марк Закерберг ги отфрли таквите шпекулации.
Тој тогаш изјави дека е глупост да се тврди дека лажни вести влијаеле на конечниот изборен резултат.
Подоцна сепак ја промени изјавата велејќи дека тие како компанија имаат поголема одговорност отколку само да создадат технологијата низ која поминуваат информации.