Facebook го следи примерот на Twitter и соопшти дека воведува ново правило според кое корисниците ќе добиваат потсетник доколку пробаат да споделат вест чиј линк воопшто не го отвориле за да ја прочитаат.
Од Facebook известија дека на почеток овој додаток ќе им се појавува севкупно на 6% од корисниците кои на оваа социјална мрежа пристапуваат преку андроид.
„Почнувајќи од денес тестираме начин на промовирање на поинформирано споделување новинарски вести. Доколку споделувате вест од линк кој не сте го прочитале, ќе ви пуштиме порака охрабрувајќи ве да го отворите и да го прочитате пред да го споделите со други“, стои во објавата на Facebook.
Поттикнувањето на луѓето да ги читаат вестите кои ги споделуваат може да се сфати како нова битка на Facebook против ширењето на дезинформациите против кои оваа платформа одамна се бори.
На тој начин пораката која ќе се појавува ќе го информира корисникот дека неотворањето на вестите кои се споделуваат може да има контра ефект бидејќи често насловите не ја откриваат суштината на целата сторија, а неретко и водат кон погрешен впечаток.
