Претседателскиот кандидат на Барселона сака Лео Меси да остане во клубот и да ја има улогата како Мајкл Џордан во Чикаго Булс.
Жорди Фаре е еден од кандидатити за нов претседател на каталонскиот клуб кој е без предводник откако Жузеп Марија Бартомеу си поднесе оставка кон крајот на минатиот месец. Изборите за нов претседател се закажани за 24 јануари, главен фаворит за победа е Виктор Фонт, додека Фаре со проектот за Меси ќе се обиде да ги сврти резултатите во своја полза.
„Да се фрла сенка на она што Меси го има направено за нас не е во ред. На Меси треба да му се понуди доживотен проект. Треба него да го претвориме во нашиот Џордан. Работиме на тоа на Меси да му биде понуден проект поврзан со управувачкиот дел во клубот“, вели Фаре.
Но, неизвесноста дали Меси ќе продолжи да игра за Барселона и натаму постои со оглед на тоа што неговиот договор истекува веќе во јуни.
„Веќе зборувавме со неговиот агент. Имаме понуда. Не се во прашање пари. Меси веќе има куп пари, ова е љубовна приказна. Сигурен сум дека имам проект кој ќе го убеди Меси“, тврди тој.
Аргентинскиот ас сакаше летово да си замине од Барселона, но на крајот сепак остана да игра под новиот тренер Роналд Куман.