Експертот имунолог и советник на американскиот претседател за пандемии, Ентони Фаучи, изјави дека му олеснало откако Доналд Трамп заминал од Белата куќа.
Со почетокот на пандемијата Фаучи беше многу активен во комуникацијата со новинарите, а во последните месеци се држеше на дистанца од медиумите.
„Отсекогаш сум кажувал сè што знам и затоа понекогаш имав проблеми“, рече тој.
Тој објасни дека му било тешко да слуша изјави што немаат научна основа. Тој исто така призна дека бил многу вознемирен кога Трамп се залагал за употреба на хидроксихлорокин во терапијата за коронавирус во март, зборувајќи за лекот против маларија за кој се покажа дека нема ефект против вирусот.
„Не беше воопшто лесно да му се спротивставиш на претседателот“, рече Фаучи, додавајќи: „И се чинеше дека тоа не може да остане без последици.“
„Сознанието дека можам да дојдам овде денес, да кажам што знам, да презентирам докази и да зборувам врз основа на науката е ослободувачко чувство“, заклучи тој.
