Како што наближува датумот за премиера на новиот филм од „Star Wars“ франшизата, така се подгреваат шпекулациите за новите и стари ликови кои би можеле да се најдат во филмот. Режисерот Рајан Џонсон ги демантираше тврдењата дека еден од фаворитите на публиката ќе биде дел од новото продолжение.
Лук Скајвокер и Леиа Органа ќе бидат дел од новото продолжение на „Star Wars“ франшизата, но овој филм ќе помине без присуството на Ландо Калрисијан.
Режисерот Рајан Џонсон предизвика разочарување кај сите фанови на „Star Wars“, и потврди дека симпатичниот Ландо нема да биде дел од „The Last Jedi“.
„Не, и не сакам фановите да се надеваат на такво нешто. Ландо не е во филмот, и никогаш немавме ниту намера да го ставиме таму. Мислам, го сакам ликот и ќе беше забавно да го видиме повторно на филмското платно, но едноставно немаше место за неговиот лик во приказната“, рече Џонсон во интервјуто за EW.
Во истото интервју, Рајан Џонсон потврди дека филмот ќе биде долг два и пол часови, со што ќе стане најдолгиот филм од франшизата, надминувајќи го времетраењето на „Attack of the Clones“ за само 8 минути.