Сè почести се предупредувањата од американското ФБИ поврзани со сајбер безбедноста.
Најновото во низата, иако првенствено беше објавено за американските корисници, го привлече вниманието и на интернет корисниците ширум светот.
Предупредувањето објавено на официјалната веб-страница на ФБИ бара од корисниците да престанат да користат веб-страници кои нудат бесплатни конвертори на документи (анг. document converters).
Според ФБИ, нивните агенти добиле зголемен број извештаи за измами кои вклучуваат бесплатни алатки за конвертирање документи од еден формат во друг. Таквите страници кријат малициозни програми кои се користат за кражба на лични информации на жртвите и, во најлош случај, за лансирање на рансомвер на уредот на жртвата.
„Сајбер-криминалците ширум светот користат секаков вид бесплатна алатка за конвертирање документи во друг формат. Тие исто така создаваат страници кои ветуваат спојување на повеќе JPG-датотеки во еден PDF документ или преземање MP3 или MP4-датотеки“, соопшти ФБИ.
Тие објаснуваат како сајбер-криминалците создаваат веб-страници кои навидум нудат бесплатна конверзија на документи од еден формат во друг. Меѓутоа, наместо документот, корисниците преземаат малициозни програми на нивните компјутери. Покрај тоа, можно е да се „украдат“ податоци од самите документи - имиња, податоци за криптовалути, лозинки, адреси на е-пошта, лозинки и други информации.
„Измамниците имитираат легитимни веб-адреси со промена на само една буква во адресата“, објаснуваат од ФБИ. Корисниците кои пристапуваат до таквите страници преку пребарувачите се особено ранливи бидејќи алгоритмите сега вклучуваат платени резултати кои можеби се лажни.
Теренската канцеларија на ФБИ во Денвер препорачува да ги преземете следните активности за да се заштитите од оваа измама:
- Дишете, забавете и размислете. Бидете свесни за вашите постапки на интернет и на какви ризици може да бидете изложени.
- Редовно ажурирајте го софтверот за скенирање вируси и скенирајте ја секоја датотека што ја добивате пред да ја отворите за да ја елиминирате инсталацијата на малициозен софтвер на вашиот компјутер.
Ако навистина станете жртва, еве неколку чекори што треба да ги преземете:
- Веднаш контактирајте со вашите финансиски институции. Преземете чекори за да го заштитите вашиот идентитет и вашите сметки.
- Променете ги сите ваши лозинки користејќи чист, доверлив уред.
- Пријавете го инцидентот во полиција и во Националниот CERT (Computer Emergency Response Team).
- Вклучете ажуриран софтвер за скенирање вируси за да проверите дали има потенцијално злонамерен софтвер инсталиран од измамници. Размислете да го однесете вашиот компјутер во професионална компанија специјализирана за услуги за отстранување на вируси и малициозен софтвер.
