Роџер Федерер, третиот тенисер на светот, вели дека повредите се зад него и сега е 100 отсто подготвен за да ја продолжи сезоната и борбата со најдобрите.
Швајцарецот во текот на сезоната на трева го повреди зглобот на раката и во текот на оваа повреда тој играше на Вимблдон, а потоа и во Соединетите Американски Држави.
„Сега немам никакви проблеми со здравјето. Беше поинаку во последните неколку месеци, бидејќи ја повредив раката за време на сезоната на трева. Беа потребни три месеци за да оздравам“, рече Роџер.
Федерер сега го очекува турнир во Базел, а токму пред овој настан тренираше и со Стен Вавринка, кога и се обрати на медиумите.
„Кога ќе ја повредите раката или зглобот на раката секогаш е потребно време за повредата целосно да помине. Лошо се чувствував бидејќи играв повреден три месеци и затоа сега сум среќен што конечно сѐ е во ред“, истакна Швајцарецот.
Федерер во првото коло во Базел ќе се сретне со српскиот тенисер Филип Крајиновиќ, а мечот е на програма во вторник.
„Ако загубам во првата рунда во вторник повторно сѐ ќе биде поинаку. Овој турнир го освоив осум пати, но секогаш морам да знам дека станува збор за нов турнир“, заклучи легендарниот Федерер.
