Се ближи последниот меч во кариерата на еден од најдобрите тенисери на сите времиња, Роџер Федерер, а во изјава за медиумите Швајцарецот рече дека ќе остане во овој спорт и по пензионирањето, на овој или оној начин.
Федерер (41) пред сè изјави дека нема да се оддалечи од тенисот по завршувањето на кариерата и дека во текот на активното играње се заљубил во многу работи.
Тој открива дека своевремено размислувал дури и да биде коментатор, но дека ќе размисли кој ќе биде неговиот следен потег.
„Мислам дека Бјорн Борг не се врати на Вимблдон 25 години откако се пензионираше. На некој начин, тоа е штета за секој љубител на тенисот. Тоа е сосема прифатливо - неговиот живот и неговите причини, но јас нема да бидам тој човек. Чувствувам дека тенисот ми даде многу, тука сум долго време и се заљубив во многу работи“, рече Федерер и продолжи:
„Сакам повторно да ги гледам луѓето, затоа сакав да им дадам до знаење на фановите дека повторно ќе ме видат, но во кое својство, ќе видиме... Морам уште малку да размислам и да си дадам време, а пред неколку недели помислив дека би можел да коментирам за тенисот, за што никогаш порано не бев заинтересиран“.
Тој вели дека жали што никогаш немал можност да игра против Карлос Алкарас и дека овој млад тенисер е доказ дека и по Надал и Ѓоковиќ ќе се појават нови ѕвезди во овој спорт.
„Жал ми е што немав шанса да играм со Алкараз, уживав додека го гледав на УС опен. Реков дека ќе се појават нови ѕвезди и тој е еден од нив. Тренирав со него еднаш на Вимблдон кога беше јуниор , добро се покажува“, вели Федерер и додава:
„Мило ми е што сум во приказната за GOAT. Сè што е над 15 Грен слем титули е бонус за мене, и искрено, не ми требаат сите рекорди за да бидам среќен“.
Еден од најдобрите тенисери на сите времиња претрпе три операции на коленото и го одигра последниот меч на Вимблдон минатата година. Се чинеше дека повредата е зад него, но непосредно пред настапот на Лејвер купот болките се вратија, па сега под знак прашалник е неговиот настап на Лејвер купот во Лондон. Сепак, се наведува дека треба да собере сили и покрај сè да го одигра она што го планирал.
