Фудбалерот на Манчестер Јунајтед Маруан Фелаини, изјави дека во Англија го третираат како „убиец“, како и тоа дека не е сигурен дали ќе остане на „Олд Трафорд“.
„За мене зборуваат дека сум агресивен играч, убиец. Јас сум фантастичен, екипата ги остварува и најтешките победи, а во неколку ситуации јас излегов како лош. Што би требало да направам кога некој ќе ме повлече за коса? Тоа звучи како шега, но навистина е болно“, изјави Фелаини за белгиските медиуми.
Тој се пожали и на третманот во англиската лига.
„Минатата сезона бев суспендиран после дербито со Сити, бидејќи наводно со глава сум го удрил Агуеро. Тој стоеше пред мене, а потоа падна, мртов. Но, не, јас добив црвен картон. Играчите често се обидуваат да ме провоцираат, а дали знаете колку жолти картони добив минатата сезона? Само 4 во 45 натпревари“, додаде белгискиот фудбалер.
Кон почетокот на годината Манчестер Јунајтед ја активираше клаузулата за продолжување на неговиот договор на уште една година, но неизвесно е дали 30-годишниот фудбалер ќе остане и понатаму на „Олд Трафорд“.
„Ми дадоа понуда, можеби ќе има уште една. Не знам дали ќе прифатам, Ќе видиме. Не можеш тоа туку така да го направиш, во момент. Да не ме сакаа во клубот, веќе би ме известиле за тоа“, додаде Фелаини.
Фелаини околу својата ситуација разговарал и со тренерот на Јунајтед, Жозе Мурињо.
„Тренерот ги почитува желбите и одлуките на своите играчи“, вели Фелаини.
Фелаини оваа сезона одигра девет првенствени натпревари и постигна три гола, а моментално заздравува од повреда на коленото.
