Претседателот на Фенербахче, Али Коч, ги замоли навивачите да помогнат во финансирање на платата на Месут Озил преку СМС кампања.
Искусниот 32-годишник вчера официјално го парафираше договорот со турскиот гигант до летото 2024 година, според кој треба да заработува околу четири милиони евра годишно.
Сепак, Фенербахче во моментов е оптоварен со големи долгови и ќе му треба помош за исплата на платата на Озил, како што потврди претседателот Коч во изјавата за Daily Mail.
„Имаме барање до нашите навивачи и партнери. Продолжете да нѐ поддржувате, а исто така зависиме и од вашата финансиска поддршка. На денот на потпишувањето на Озил, ќе ве замолам да го срушите рекордот испраќајќи СМС-пораки за да донирате пари на клубот. Може да се соберат 300.000, 500.000 или можеби дури и милион пораки. Оваа поддршка ќе ни значи“, рече првиот човек на Фенербахче.
Една СМС порака ќе чини 2,25 евра и се праќа на бројот 1907, што ја симболизира годината кога Фенербахче беше основан. Клубот веќе добил 150.000 пораки за само еден ден.
За потсетување, Озил го раскина договорот со Арсенал вреден 400.000 евра неделно со цел да се префрли во Фенербахче како слободен агент, а како што пишува шпанскиот весник AS, новата неделна плата на Германецот ќе изнесува „само“ 75.000 евра.
Тоа се дури 325.000 евра помалку отколку што имаше во клубот од Лондон, но 32-годишниот играч сепак ќе има можност да ја зголеми заработката во Фенербахче преку дополнителни бонуси.
Озил ќе го носи бројот 67 во Фенербахче до крајот на оваа сезона во чест на баба му и дедо му кои пораснале во турскиот град Зонгулдак, чиј поштенски код е 67.
Но, на крајот на оваа сезона, тој ќе го добие бројот 10 што во моментов го носи танзанискиот напаѓач Мбуана Самата.
