Серијата „The Queen's Gambit“ го обнови интересот за шах, што најдобро може да се воочи во продавниците за онлајн апликации каде масовно се преземаат апликации за шах.
Во моментов, „The Queen's Gambit“ е една од најпопуларните серии на Netflix. Милиони ширум светот го гледаа (или сè уште го следат) подемот на „чудото од дете“ Бет Хармон (ја игра Ања Тејлор-Џој) од сиропиталиште до шаховска ѕвезда, а она што е особено интересно е дека благодарение на серијата, интересот за оваа древна игра повторно се зголеми.
Многумина веројатно повторно ги извадија старите шаховски табли со црно-бели фигури и барем на кратко „побегнаа“ од пандемската реалност, додека други, особено помладата генерација, се свртеа кон шахот на онлајн преку разни шаховски апликации.
Влијанието на серијата „The Queen's Gambit“ не познава граници и се преслика и во современиот дигитален свет. Популарноста на Chess.com и придружните мобилни апликации е значително зголемена. Набргу откако серијата започна да се емитува, апликацијата брзо се најде на третото место во категоријата стратешки игри за iPhone во САД и на второто место во онлајн продавницата за апликации на Apple во Велика Британија. Според податоците на компанијата App Annie, оваа апликација во САД скокнала за дури 256 места и сега е на 62-то место меѓу сите игри.
Она што е особено интересно е што бројот на преземања на оваа шаховска апликација е доста различен за iPhone и Android. Иако самата апликација е повеќе или помалку иста и нема разлика во преземањето помеѓу овие платформи, во последно време бројот на преземања на телефоните на Apple е зголемен за 61% во споредба со мобилните уреди со оперативниот систем на Google.
