Кошаркарите на Бостон Селтикс ги совладаа Голден Стејт Вориорс со 92:88 во средбата меѓу двете најдобри екипи во НБА.
Селтикси на тој начин продолжија со неверојатната низа на победи (14) , а на тој пат паднаа и актуелните шампиони на најсилната лига на светот.
Екипата на Бред Стивенс сезоната ја започна со тешката повреда на Хејворд и два порази по ред, но успеа да се подигне од тешката ситуација и да оствари 14 победи по ред.
Последниот дојде после драма и тоа против Вориорси, кои се главни претенденти за титулата во НБА.
Селтикси повторно беа во заостаток и тоа дури 17 поени во третата четвртина, меѓутоа со одличната игра успеаја да се вратат и да го воведат натпреварот во неизвесна завршница.
Бостон до победата го предводеше одличниот Џејлен Браун со 22 поени и седум фатени топки, потоа Ал Хофорд со дабл – дабл учинок, Кајрл Ирвинг со 16 поени, шест асистенции и пет скокови, како и Тејтум и Морис кои забележаа 12 поени.
Во редовите на Голден Стејт единствен расположен беше Кевин Дурант кој мечот го заврши со 24 поени, додека сите останати потфрлија.