Поранешниот дефанзивец на Манчестер Јунајтед, легендарниот Рио Фердинанд, се присети на периодот кога во овој клуб пристигна голманот Давид Де Геа, нагласувајќи дека шпанскиот чувар на мрежата моментално е најдобриот голман на светот.
Фердинанд изјави дека играчите од соблекувалната не верувале во квалитетите на Де Геа кога во 2011 година пристигна во Манчестер Јуанaјтед, но дека ситуацијата сега е потполно поинаква.
„Кога Де Геа пристигна во Манчестер Јунајтед, соиграчите од соблекувалната се сомневаа во него. Беше исклучително млад, а на нас во тој момент ни беше потребно да победуваме секоја година. Размислувавме дали можеме да постигнеме такво нешто со дете и неискусен голман кој делуваше како да му недостига самодоверба, а погледнете го сега. Тоа е знак за некој кој многу вредно работел за да стане она што е сега“, изјави Фердинанд.
„Тој е најдобар голман на светот, а како таков, не мора да има одбрана на секои десет минути. Секогаш е концентриран, неговите рефлекси и брзина одземаат здив“, заврши овој легендарен дефанзивец.
За потсетување, Давид Де Геа беше најдобриот поединец во рамките на првиот натпревар од осминафиналето во Лигата на шампионите, кој се одигра во Андалузија меѓу екипите на Севиља и Манчестер Јунајтед.
Во таа средба, само благодарение на неговите чудесни одбрани, екипата на Жозе Мурињо не доживеа пораз во Шпанија и сега им е потребна победа на домашен терен за да си обезбедат пласман во четвртфиналето од најелитното фудбалско натпреварување.
Во оваа сезона во Премиер лигата, Де Геа на голот на Манчестер Јунајтед прими 19 погодоци, што е најмалку во лигата, а во досегашните 27 натпревари, 16 пати успеа да ја сочува својата мрежа.