Младиот англиски репрезентативец Маркус Рашфорд вчера влезе од клупата на натпреварот против Бурнемут и го постигна победничкиот гол за Манчестер Јунајтед. Тоа го предизвика Рио Фердинанд да даде коментар за моменталната ротација во нападот на неговиот поранешен тим, советувајќи го Мурињо дека треба да му даде поголема минутажа на 21-годишниот Рашфорд.
Манчестер Јунајтед дојде до трите бода на тешкото гостување кај Бурнемут благодарение на Ентони Марсијал и Маркус Рашфорд, кои ги постигнаа двата гола за гостинскиот тим.
„Ѕвездата на тимот, Маркус Рашфорд, мора да стартува почесто отколку досега. Само така ќе може да ја најде неговата вистинска позиција на теренот“, изјави поранешниот капитен на Манчестер Јунајтед, Рио Фердинанд.
Легендарниот англиски дефанзивец Рио Фердинанд од поодамна е фан на Маркус Рашфорд, локалното момче кое се проби до првиот состав на Манчестер Јунајтед и ги импресионираше сите во неговата прва сезона како професионален фудбалер. Но, оттогаш воопшто не беше стандарден во составот на тимот и добива мала минутажа, најчесто од клупата.
„Рашфорд е голем талент кој треба да се негува. Мурињо му даде голема минутажа од клупата, но мислам дека треба да биде стартер. Веројатно и тој самиот мисли дека треба да го стартува секој натпревар, а ако не се случи тоа набрзо, ќе стане несреќен со ситуацијата во клубот“, додаде Фердинанд.
Во моментов довербата на тренерот ја ужива Ромелу Лукаку, кој беше стартер во најголемиот дел од натпреварите. Иако тој сезонава беше далеку под неговото ниво, сепак е прв избор во списокот на Жозе Мурињо, а на Рио Фердинанд не му се допаѓа тоа.
„Погледнете го Лукаку. Тој постигнува голови, но во големите клубови мора да правиш многу повеќе од тоа. Мора да играш со топка, да асистираш, да ја организираш играта. Во моментов нешто се случува со Лукаку, а тоа не им се допаѓа на останатите играчи“, вели Фердинанд.
Со вчерашната победа Манчестер Јунајтед дојде до 20 бода во сезоната и се наоѓа на седмото место на табелата во Премиер лигата, но заостанува зад групата од тимови кои се борат за титулата.
