Неделата на автомобили во Монтереј беше една од најдобрите во модерната историја, со неколку фантастични автомобили кои дебитираа, додека некои класици најдоа нови домови.
Меѓу продадените автомобили беше и едно одлично Ferrari за кое новиот сопственик плати рекордна сума, поточно 22.005.000 долари.
Станува збор за Ferrari 410 Sport Spider од Scaglietti од 1955 година, кое го собори минатогодишниот рекорд од 20.465.000 долари платени за McLaren F1 со LM спецификации. Сумата е зголемена за речиси 1,6 милиони долари, но тоа не е големо изненадување со оглед на историјата на автомобилот.
Ferrari 410 Sport Spider на фотографиите е сè што еден посакуван класик треба да биде. Создадено е специјално за трки и има постигнато неколку големи победи, управувани од двајца исклучително успешни и светски познати возачи. Тоа се Хуан Мануел Фанџо, еден од великаните на Формула 1, како и легендарниот Керол Шелби. Всушност, Шелби постигна повеќе победи токму во овој автомобил отколку во кој било друг што го возел во текот на неговата кариера.
Да потсетиме, зборуваме за човекот кој ја „избриша“ насмевката од лицето на Енцо Ферари на Ле Ман. Покрај споменатото дуо, ова Ferrari го возеле и Фил Хил, Еуџенио Кастелоти, Мастен Грегори, Ричи Гинтер, Јоаким Бониер, Брус Кеслер, Џим Ратман и Чак Деи.
Прекрасниот автомобил одигра голема улога на американската тркачка сцена во 1950-тите.
Го придвижува 4,9-литарски V12 мотор кој развива 400 КС.