Компанијата позната по својот тркачки тим во Формула 1 и спортски автомобили со голема моќност, утре ќе лансира модна колекција, а два дена подоцна ќе отвори ресторан во градот Маранело.
Дебитантската колекција на Ferrari ќе биде претставена на модна ревија во живо, исто така, во Маранело, а компанијата состави тим експерти кои ќе ѝ помогнат да зачекори во светот на високата мода.
На крајот на 2019 година, Ferrari го започна овој лајфстајл проект кој има за цел проширување на бизнисот, и за креативен директор беше назначен модниот дизајнер Роко Јаноне.
За колекцијата е задолжена продукциската куќа Bureau Betak, која стои зад дебитантската ревја на Ким Џонс за Fendi, што беше претставенa на почетокот на оваа година, а ревијата ќе ја дизајнира соработникот на италијанскиот Vogue, Џејкоб Кјелдгард од Yves Saint Laurent.
Никола Боари, главен директор за диверзификација на брендот Ferrari, за Reuters изјави дека целта е да се достигнат нови клиенти „и во однос на возраста и на културата“ – пошироко од љубителите на трки и клиентите за спортски автомобили кои веќе копнеат по своите брендирани јакни, маици и капи.
Ferrari со ваквиот потег им се придружува на Lamborghini, Bentley и Harley-Davidson, кои веќе имаат свои линии на лајфстајл производи.
