Управниот одбор на Фудбалската фгедерација на Македонија веќе ги одреди цените на билетите за важниот натпревар против Косово кој е полуфинален бараж за пласман на ЕУРО 2020.
Единечна карта за Северната трибина од Националната арена „Тоше Проески“ ќе чини 400 денари за централните делови, додека 300 денари за страничните сектори. Истиот принцип важи и за Јужната трибина.
На Западната трибини билети во слободна продажба ќе нема бидејќи повеќе навивачки групи од ширум Републикава најавија свое присуство и заради безбедност на останатите љубители на фудбалот тие сите заедно ќе бидат сместени на Запад. Своето присуство како организирана навивачка група по мотото „Обединување“ досега го потврдија Комити, Чкембари, Лозари, Војводи, Рибари, Сејмени и Гемиџии.
Билети нема да се продаат ниту за Исток со оглед на тоа што таа трибина ќе биде за гостинските навивачи кои под силно полициско обезбедување ќе бидат присутни на натпреварот. На навивачи со обележја на гостинската репрезентација нема да им биде дозволен влез на останатите трибини без разлика дали имаат билет.
Билетите ќе се продаваат по принципот едебн човек еден билет и тоа со приложување документ за лична идентификација. Натпреварот ќе биде и под строга контрола на УЕФА која ќе инсистира на применување на строги правила за безбедност на трибините со оглед на неповолната атмосфера помеѓу двете држави.
Натпреварот е закажан за 26 март со почеток во 20.45 часот. Победникот од овој дуел ќе оди во финалниот бараж каде ќе се сретне со победникот од дуелот помеѓу Грузија и Белорусија. Домаќин на финалето ќе биде токму победникот од Грузија - Белорусија, а тој натпревар ќе се игра на 31-ви.
