Раководството на Фудбалската федерација на Македонија на еден од терените од тренинг центарот „Петар Милошевски“ одржа состанок со раководните луѓе на десетте клубови од Прва македонска фудбалска лига.
Претставниците на Вардар, Силекс, Шкендија, Ренова, Македонија ЃП, Шкупи, Академија Пандев, Работнички, Борец и Струга беа присутни на состанокот со претседателот на ФФМ, Муамед Сејдини, потпретседателот Лазар Ракиџиев, генералниот секретар Филип Поповски, заменик генералниот секретар, Дрилон Ганиу и претседателот на натпреварувачката комисија, Игор Франговски.
Состанокот имаше консултативен карактер во однос на начинот и предлозите за завршување на прекинатата натпреварувачка 2019/2020 сезона од Прва МФЛ.
Конечна одлука за натпреварувачката сезона, ФФМ заедно со клубовите ќе донесе на нов состанок во најскоро можно време откако ќе ги добие препораките и мерките од протоколот за одржување тренинзи и одигрување натпревари од координативниот кризен штаб за обезбедување целосна координација во врска со спречување на внесување и ширење на коронавирусот.
На денешната средба претставниците на прволигашите се согласија дека поради органичената временска рамка нема услови да се одиграат сите преостанати натпревари до крајот од тековната сезона (13 кола и полуфинале и финале од Купот на Македонија). По добивањето на протоколот за заштита од COVID-19, Федерацијата и клубовите ќе излезат со заеднички став околу евентуалното продолжување на првенството во скратен формат или целосен прекин на натпреварувачката сезона 2019/20.
Фото: Петр Стојановски / ФФМ