Фудбалската федерација на Македонија денеска ги предаде во трајна сопственост трите амбулантни возила кои таа ги набави за потребите на Клиниката за хируршки болести „Св. Наум Охридски“ во Скопје.
Она што ФФМ го најави пред околу месец дена, денеска и го реализираше. Трите целосно опремени амбулантни возила од денеска се во функција за потребите на „Св. Наум Охридски“ (стара Градска болница) каде претседателот Муамед Сејдини заедно со подпретседателот на ФФМ ги предадоа на директорот на болницата д-р Љубен Арсенков.
„Соочени со последиците од здравствената криза и имајќи ја предвид сериозноста на ситуацијата во која се наоѓаат граѓаните на нашата држава, но пред сѐ, нашите здравствени работници, ФФМ ги обезбеди трите амбулантни возила. Исто така, даночните повластувања кои произлегуваат од Законот за спонзорства и донации, ФФМ нема да го поврати, напротив од истиот се откажува во корист на државата и фондот за борба против COVID-19“, велат од ФФМ.
„Едноставно, ова е време и моменти кои нѐ потсетуваат дека здравјето на луѓето е најважно. Нашата социјална одговорност досега многу пати била потврдена, тоа е еден од важните постулати во работењето на ФФМ и наша должност е да помогнеме со надеж дека ќе придонесеме во ублажување на последиците од оваа состојба, изјави претседателот на ФФМ.
„Денеска се ефектуираше најавената донација во три санитетски возила од Фудбалската федерација на Македонија коишто ќе бидат во сопственост на клиниката хируршки болести „Св. Наум Охридски“. Овие возила ќе ни бидат од големо значење во нашата секојдневна работа за транспорт на пациенти. Досега имавме возила кои се стари над 20 години и ова освежување во возниот парк навистина ни значи многу, изјави директорот на Клиниката за хируршки болести.
Возилата се од марката Citroën Jumper.
Фото: ФФМ