Крај на сите дилеми: досегашниот селектор Игор Ангеловски ќе ја води Македонија и на Европското првенство, потврди ФФМ.
Ангеловски пред некој ден беше во ФФМ на разговор со претседателот Муамед Сејдини, а денеска Управниот одбор на федерацијата го потврди продолжувањето на договорот кој истече на 31 декември 2020.
„Како што ветивме пред јавноста за нашиот прв избор за селектор, денеска потврдуваме дека го продолжуваме патот кон успехот. Со Игор лесно се договоривме за сите детали околу продолжување на соработката бидејќи и кај него и кај нас владееше позитивно расположение успехот што го направивме да го продолжиме заедно. Ние сме професионалци и знаеме дека добрите резултати даваат поголема шанса за задржување на некоја позиција. Горди сме на сѐ што направивме како репрезентација и федерацијата ќе продолжи да обезбедува најдобри услови за работа, како што впрочем беше и досега“, вели претседателот Сејдини.
ФФМ сепак не прецизираше до кога е новиот договор на Ангеловски, дали заклучно со Европското првенство, или подолго.
„Пласманот на Европското првенство е сон за секое дете, а фудбалерите сега имаат исклучителен мотив за нови победи. Сега треба да помогнеме сите, на било кој начин, а потоа ќе зборуваме за нашиот пласман на ЕУРО 2020 и колку тоа значи за иднината на македонскиот фудбал“, додаде тој.
И селекторот, нормално, е задоволен од укажаната прлика да го оствари својот сон, да ја предводи македонскат фудбалска репрезентација на историското, за нас, прво Европско првенство.
„Благодарност до претседателот на федерацијата и Управниот одбор за довербата. Не се сомневам дека репрезентацијата, како и досега, ќе ги има најдобрите услови за работа. Ќе го вложам сиот свој потенцијал да возвратиме со добри игри и да ја продолжиме успешната резултатска низа. Како што ветив и пред јавноста, сѐ она што ми беше понудено во форма на договор го прифатив, а националниот го ставив пред личниот интерес. Благодарност до капитенот, фудбалерите од репрезентацијата и јавноста за поддршката. Верувам дека сите заедно и сложно повторно ќе се радуваме на големи победи, а овој пат ќе славиме сите заедно низ улиците на нашиот град и нашата држава“, ијави старо-новиот селектор, пренесе ФФМ.
За Ангеловски сега прв предизвик е почетокот на квалификациите за пласман на Мундијалот 2022 во Катар. Натпреварите почнуваат кон крајот на март, а Македонија ја чекаат три натпревари: Романија (гости, 25-ти), Лихтенштајн (дома, 28) и Германија (гости, 31). Потоа следува ЕУРО во јуни.