Сите фудбалски натпреварувања под капата на Фудбалската федерација на Македонија се времено суспендирани поради засилените мерки на Владата во борбата против ширењето на корона вирусот.
ФФМ се приклучи кон апелот на Владата и по КФМ и таа стави локдаун во сите нејзини натпреварувања. Викендов нема да се играат првата и двете втори лиги, како и третите лиги. ФФМ уште претходно ги прекина сите младински натпреварувања.
„Натпреварувачката комисија во рамки на Фудбалската федерација на Македонија донесе одлука за прекин на неодредено време на националниот шампионат од Прва и Втора МФЛ, потоа Третите лиги од МФЛ, како и натпреварите од женскиот шампионат и првенството во футсал. Одлуката е донесена по последните препораки и забрани од Министерството за здравство за превенција од вирусот COVID-19, кои опфаќаат забрана на сите јавни и приватни собири, без разлика на обемот и бројката на учесници - концерти, театри, кина, спортски сали, теретани. Претходно, согласно препораките и забраните од Владата на Македонија за превенција од вирусот COVID-19, Комисијата за младински фудбал донесе одлука сите натпревари од младите категории и натпреварите од Детските лиги на ФФМ да се суспендираат во наредните две седмици“, стои во официјалното соопштение на веб-страницата на ФФМ.
Истотака, ФФМ вчера испрати допис до УЕФА во кој се бара одложување на претстојниот бараж натпревар против Косово за пласман на ЕУРО 2020 кој е закажан за 26 март во Скопје.
Првата лига оди во мирување по синоќешното 23. коло по кое Вардар води со 46 бодови пред Силекс со 36 и Шкендија со 35. Во двете втори лиги се одиграа 16 кола: на Истокот води Беласица со 40 пред Брегалница со 37 бодови, а на Западот прв е Пелистер со 33 пред Скопје со 29. Од третите лиги, пролетниот дел е почнат само во групите Југозапад и Центар, а токму викендов требаше да почне во Север и Запад. Југоисток допрва требаше да почне.
