Претседателот на Фудбалската федерација на Македонија соопшти дека се разгледуваат неколку можни сценарија за рестартирање на домашниот фудбал, а целосен прекин е последна опција.
„Како резултат на ширењето на коронавирусот јасно е дека се променети сите околности во фудбалот за оваа натпреварувачка година. ФФМ во соработка со фудбалските клубови и натпреварувачката комисија во Федерацијата работи на низа практични решенија како одговор на новонастанатата ситуација. Постојано следејќи ја моменталната ситуација, комисијата во ФФМ која е задолжена за календарот на натпревари, во најскорен можен рок ќе ги претстави плановите за завршување на натпреварувачката сезона во МФЛ. Се разбира, во услови кои ќе бидат диктирани од телата на јавната власт. Прекин на првенството е последно можно решение, откако ниту една алтернатива не би овозможила да се заврши календарот за натпреварувачката сезона во МФЛ“, вели претседателот Муамед Сејдини.
ФФМ експресно ја одби финансиската помош која државата ја намени за спортските субјекти со цел таа да се пренасочи за потребите во здравството. Сејдини најави дека доколку од УЕФА и ФИФА пристигне парична помош, сите средства ФФМ ќе ги пренасочи кон клубовите како најзагрозени од кризата.
„Фудбалската федерација на Македонија, како и секогаш до сега, кон фудбалската заедница ќе покаже одговорност, единство и солидарност. Ќе ги искористиме сите механизми кои ги имаме на располагање во насока на било каква помош на клубовите и фудбалските работници. Како Федерација сме во постојана комуникација со УЕФА и ФИФА и доколку се определи одреден солидарен фонд кои би го користеле федерациите, ФФМ целосно ќе го пренамени кон клубовите“, рече тој.
Во Првата лига преостануваат да се доиграат уште 13 кола, додека во двете второлигашки групи уште 11. Купот е стигнат до полуфиналето, а во прекин се и сите останати натпреварувања како третите, четвртите и петтите лиги, женската лига, младинските лиги како и лигата во мал фудбал.
