Дури 10 години поминале, а како да беше вчера. На денешен ден Владо Илиевски ја расплака Литванија со тројката за победа на секунди пред крајот.
Во својата објава на Twitter ФИБА вели дека на денешен ден пред точно 10 години Македонија ја шокирала Литванија со едно од најголемите изненадувања во историјата на ЕвроБаскетот.
Токму така и беше. Литванија беше домаќин на тој континентален собир и атакуваше на медал, но неочекувано се сопна во четвртфиналето откако налета на забрефтаната Македонија на Антиќ, Илиевски, МекКејлеб, Гечевски, Чековски, Самарџиски, браќата Стојановски...
Тогаш, на минута до крајот во преполната „Жалгирис“ арена Литванците имаа 4 поени разлика (65:61) кога МекКејлеб во соло продор постигна двојка и намали на 64:63. Литванците не успеаја да погодат од два напада еден по друг, но потоа и Македонците промашија преку МекКејлеб. Сепак, едно лошо додавање и топката повторно се најде во македонски посед за атомски напад во кој се бараше удар кон домашниот обрач. Секундите брзо течеа, Литванците го затвораа секој приод, а се отвори само една опција - удар за тројка кој Владо Илиевски „без коски“ го погоди за неверување на 15-илјадната публика и огромна радост на околу 300 македонски навивачи.
Македонија потоа во полуфиналето налета на моќната Шпанија, која подоцна стана и шампион, и ја прекина одличната серија. Потоа не успеа и во борбата за бронзата откако Русија нѐ совлада со 72:68, но сепак и тоа 4. место е историски и огромен успех за македонската кошарка, упсех кој од денешна гледна точка делува светлосни години далеку.