ФИФА покрена истрага за трансферот на Бруну Фернандеш од Спортинг во Манчестер Јунајтед откако италијанската Сампдорија поднесе тужба против португалскиот гигант.
Клубот од Џенова го продаде португалскиот играч од средниот ред на Спортинг во 2017 година и во моментов бара 10%, или нешто повеќе од 5 милиони евра, од договорот со „Црвените ѓаволи“.
Сампдорија тврди дека тоа било една од трансфер-клаузулите во договорот за продажбата на Бруну Фернандеш.
ФИФА преку својот портпарол потврди дека во моментов се води истрага.
– Сампдорија поднесе тужба до ФИФА против португалскиот клуб Спортинг од Лисабон во врска со финансиските обврски поставени во договорот за трансферот на Бруну Фернандеш, соопшти централата.
Португалскиот играч од средниот ред се пресели во Манчестер Јунајтед во текот на зимата за околу 50 милиони евра.
Фернандеш во Сампдорија играше само во сезоната 2016/17, а дојде од Удинезе како позајмен, но со задолжителен откуп на крајот од сезоната. На 33 натпревари Португалецот постигна 5 голови, а Самп го реализираше трансферот иако не беа задоволни од неговите игри. Сепак, летото се ослободија од него продавајќи го во Спортинг за 8,5 милиони евра.
Таму Фернандеш се разигра и на 83 натпревари постигна 29 голови во трите сезони минати во клубот од Лисабон. Потоа на сцена стапи Јунајтед.