На вчерашната манифестација ФИФА ги објави и победниците во изборот за најдобар тим за 2020 година каде за прв пат се најде и Канаѓанец.
По тројца фудбалери има од европскиот шампион Баерн и англискиот шампион Ливерпул, додека дури деветмина се од различна репрезентација, освен Шпанија која има двајца. За прв пат во најдобрите 11 има канадски фудбалер, земја каде фудбалот не е ниту во топ 5 омилени спортови.
Иако наградата за најдобар голман на годинава отиде кај Мануел Нојер од Баерн, на голот во најдобрите 11 е Алисон Бекер од Ливерпул/Бразил.
Во одбраната се Трент Александер-Арнолд (Ливерпул/Англија) и Алфонсо Дејвис (Баерн/Канада) по латералните позиции со Серхио Рамос (Реал Мадрид/Шпанија) и Вирхил ван Дајк (Ливерпул/Холандија) како централни дефанзивци.
Средината е составена од Кевин де Брујне (Манчестер Сити/Белгија), Тиаго Алкантара (Ливерпул/Шпанија) и Јошуа Комих (Баерн/Германија).
Триото во нападот делува навистина убиствено: Лионел Меси (Барселона/Аргентина), Кристијано Роналдо (Јувентус/Португалија) и најдобриот играч за 2020, Роберт Левандовски (Баерн/Полска).