Капитенот на швајцарската фудбалска репрезентација Гранит Џака, кој беше во центарот на вниманието за време на мечот со Србија, нема да биде казнет по истрагата на ФИФА против него, тврдат англиски The Sun и швајцарски Blick.
Искусниот играч за врска привлече внимание по натпреварот кога носеше дрес со името Јашари испишано на градите. Како што рече, решил да му даде поддршка на младиот колега од репрезентацијата Ардон Јашари.
Сепак, многумина веруваат дека вака Џака му оддаде почит на Адем Јашари, основачот на Ослободителната војска на Косово и тоа беше една од причините за истрагата на ФИФА, но како што тврдат The Sun и Blick, нема да има казна за овој случај бидејќи ФИФА поверува во неговото објаснување.
„Нема никаква политичка позадина. Ардон Јашари е дел од нашиот тим и поминуваме многу време заедно. Му реков дека ќе го облечам неговиот дрес ако поминеме понатаму“, рече Џака.
Ова не е првпат Џака да биде вмешан во инцидент на меч со Србија, бидејќи веќе беше казнет, заедно со Џердан Шаќири, на дуел во 2018 година кога славеа голови покажувајќи симбол на орел.
Утре Швајцарија ќе игра против Португалија во битката за четвртфиналето на Светското првенство.