Синоќа на натпреварот од отворањето на Светското клупско првенство главниот судија како во НХЛ хокеарската лига на разглас ѝ ја објаснуваше на публиката својата одлука по консултацијата со ВАР.
Синоќа беше отворено Светското првенство за клубови со натпреварот помеѓу Окленд Сити, шампионот на Океанија, и Ал Ахли, финалистот од африканската Лига на шампиони.
Египќаните лесно изборија место во четвртфиналето победувајќи го новозеландскиот тим со 3:0 со головите на Хусеин Елшахат (45'+2), Мохамед Шериф (56') и Перси Тау (86'), а таму ќе се соочат со првакот на Северна Америка, американскиот тим на Сиетл Саундерс.
Она што ќе остане забележано се случи во завршницата на натпреварот, кога публиката посведочи историска сцена. Имено, во судиското надополнување кинескиот судија Ма Нин досуди пенал во корист на Ал Ахли.
Но, откако замина кај ВАР мониторот и ја изгледа спорната ситуација, се увери дека погрешил што покажал пенал и ја поправи својата одлука. Наместо пенал, му покажа црвен картон на Адам Мичел од Окленд Сити, кој го направи фаулот.
Многумина на стадионот „Ибн Батута“ во мароканскиот град Тангер останаа зачудени кога на разгласот го слушнаа гласот на кинескиот судија. По гледањето на снимката судијата Ма го вклучи микрофонот и на публиката ѝ објасни зошто ја променил својата одлука - дека прекршокот бил надвор од шестнаесетникот и затоа нема пенал, но има црвен картон поради сериозноста на шансата која беше спречена со фаул.
Вакви судиски објаснувања за публиката постојат во американските спортови, а најчесто се случуваат во хокеј лигата НХЛ и НФЛ за американски фудбал. ФИФА го користи Светското клупско првенство за да направи експеримент со ваквиот начин на објаснување на судиските одлуки од страна на самите судии. Доколку тестирањето се покаже како успешно, потоа ФИФА може да го воведе судиското објаснување како задолжително онаму каде што се користи ВАР.
Интересно, и идејата за ВАР дојде од НХЛ.