Министерот за здравство, Венко Филипче ја одржа редовната прес-конференција на која информираше за состојбата на пациентите кои се заразени од коронавирус во нашата земја.
Министерот информираше дека од Клиниката за инфективни болести се испишани 9 пациенти, 8 од Дебар и 1 од Скопје кои после два негативни теста се упатени на домашно лекување.
Утрово на Клиниката за инфективни болести и фебрилни состојби во Скопје почина еден пациент на 79 години, од Дебар. Пациентот е дијагностициран позитивен на Covid-19 на 23 март, а со влошена здравствена состојба хоспитализиран на клиниката во Скопје на 25 март.
Состојбата по градови:
Kуманово (3)
Скопје (19)
Дебар (1)
Прилеп (1)
Тетово (1)
Крива Паланка (1)
На Клиниката за инфективни заболувања се примени 8 нови пациенти, сега има вкупно 47 хоспитализирани.
На механичка вентилација се поставени 3 пациенти помеѓу 50-67 годишна возраст, а на кислородна поддршка се 9 пациенти. Во другите градови состојбата на пациентите е добра со сосем лесна клиничка форма, информираше министерот.
- Во Институтот за физикална медицина и рехабилитација се тестирани 46 вработени во заводот и 6 пациенти. Од нив позитивни се 8 медицински лица и двајца пациенти. Во текот на денот тестирани се уште 16 пациенти кои се хоспитализирани во Заводот. Заводот во Козле нема да работи во следниот период, а пациентите ќе бидат упатени во болницата 8 Септември, извести Филипче.
Од денеска работи уште еден пукт во Поликника „Чаир“, а од среда и пунктот во „Млин Балкан“ со што капацитетот на тестирање во Скопје се дуплира.
- Заврши и анализата на стручната комисија на приватните лаборатории. Со нивното вклучување капацитетот значајно ќе се зголеми. Имаме сосема голем број на тестови, 20 илјади тестови ќе пристигнат како донација, и уште 5 се донирани од наша приватна клиника, извести министерот.
Во врска со случувањата во изминатите 24 часа и во текот на викендот, Филипче рече дека има една почината пациентка во Општата болница во Струга која е донесена поради потешкотии во дишењето, имала и претходно хронична респираторна болест, направен е обид за реанимација, за жал починала. Но, како што нагласи министерот, таа не е дијагностицирана со коронавирус, но со оглед на сличноста на клиничката слика на оваа болест, непосредно по смртта е земен брис и кога ќе бидат готови резултатите ќе ја известат јавноста.
