Министерот за здравство Венко Филипче на денешната прес-конференција извести за ситуацијата со COVID-19 во нашата држава.
Како што претходно беше објавено, денеска се регистрирани нови 103 случаи на коронавирус, 5 лица се починати.
Министерот Филипче изјави дека и по олабавувањето на мерките во државите во регионот се регистрираат нови случаи. Иако Словенија и Црна Гора неодамна прогласија крај на епидемијата имаат регистрирано нови случаи, во Србија има 60 нови случаи. Министерот кажа дека телефонски разговарал со министрите на Бугарија и Албанија за тоа како се справуваат со епидемијата и која мерки да се преземат.
- Согласно податоците од историјата на болеста, огромен процент од починатите од коронавирус се пациенти кои имаат претходни хронични заболувања. Според денешната статистика, од 193 починати лица, најголем дел се на возраст над 60 години, а кај 76 отсто се регистрирани бројни коморбидитети, како што се хронични болести, болести на кардиоваскуларниот систем, белите дробови и шеќерна болест, изјави министерот.
Целосно опремена е монтажната болница со тријажен центар. Медицински лица се пристигнати во Скопје за да им помогнат на колегите, вели Филипче.
„Факт е дека се соочуваме со силен бран на епидемијата, охрабрува тоа што повеќето се асимптоматски случаи и со лесна клиничка слика. Се надополнуваат капацитетите и важно е луѓето да ја сфатат сериозноста на оваа ситуација. Во болниците моментално се извршуваат само најважните интервенции“, изјави министерот за здравство.
- Маска, дистанца и почитување на протоколите е нешто што сите треба да го почитуваме, апелира министерот.
Прес-конференцијата е во тек и министерот одговара на новинарски прашања.
