Министерот за здравство Венко Филипче преку социјалните мрежи повика на поголема внимателност и почитување на мерките за заштита од коронавирусот.
„Лежалката на плажа лесно се заменува со болнички кревет. Да ги почитуваме мерките за заштита од COVID-19. Да го зачуваме нашето здравје, но и здравјето на нашите родители, баби и дедовци. Затоа што нема ништо поважно од грижата за нашите најблиски. Носи заштитна маска, одржувај физичка дистанца, не се групирај и често миј ги рацете!“, порача Филипче.
Тој исто така потсети да не се заборава на актуелната епидемија кога сме на одмор.
„Ти си на одмор, но вирусот не е! Носи заштитна маска или марама кога не можеш да одржиш физичка дистанца. Да се заштитиме од ковид-19, да ги почитуваме мерките за да го стопираме ширењето на овој непредвидлив вирус. Да бидеме совесни за најблиските околу нас. Од самите нас зависи!“
Министерот исто така информира дека досега се обезбедени 61 единица конвалесцентна плазма за третман на пациенти со COVID-19.
„Крвна плазма може да дарува лице кое има оздравено од коронавирус. Ајде да бидеме хумани и да им помогнеме на пациентите кои сѐ уште се борат со овој непредвидлив вирус. Да ја покажеме нашата грижа, да даруваме и да спасиме човечки живот. Апелирам на солидарност, затоа што нема ништо поважно од нашето здравје и здравјето на нашите најблиски!“, напиша Филипче на Facebook и ја сподели веб-страницата со информации за тоа кој и како може да дарува крвна плазма.
