Министерот за здравство Венко Филипче на неговиот Facebook профил ја извести јавноста за здравствената состојба на малиот Илче од Охрид, кој беше десетина дена на лекување на Клиниката за детски болести.
Животната приказна на Илче ја потресе македонската јавност откако медиумите објавија за неговата лоша здравствена состојба. Илче е 11-годишно дете со церебрална парализа, претходно напуштено од неговите родители и незгрижено од институциите. Со помош на министерот Венко Филипче, детето беше донесено во Детската клиника, во лоша здравствена состојба. За него цело време се грижеа докторите и сестрите од Клиниката, со посебен план за исхрана.
Детето првин се хранеше преку сонда, а потоа почна самото да ги јаде оброците и да пие течности. Министерството за труд и социјална објави дека Илче ќе биде згрижен во мал групен дом откако ќе помине периодот на рехабилитација.
„Илче од Охрид по десеттина дена лекување и нега на Клиниката за детски болести успеа со плеснување на рачињата и едно големо браво да се збогува со тимот лекари кои се грижеа за него.
Илче здрав и расположен си заминува во мал групен дом. Неговата состојба кога беше хоспитализиран беше тешка, а денеска со надеж дека Илче ќе има шанса за подобар живот го испраќаме седнат расположен за игра и насмеан да влезе во новото семејство.
Огромна почит за сите здравствествени работници, тимот психолози, дефектолози, лекарите и сестрите кои цело време се грижеа за него!“, напиша министерот на Facebook.
