Скопје, 4 април 2019 (МИА) – Министерот за здравство, Венко Филипче, денеска го искажа неговиот став по новинарското прашање околу граѓанската иницијатива за донесување на закон за измена на Законот за заштита на населението од заразни болести.
„Неколку пати потенциравме дека има важечка законска регулатива. Точно е дека во делот на законот за основно образование има некои контрадикторности, но нема да дозволиме ниту едно дете да биде запишано ниту во училиште, ниту во градинка невакцинирано, заради тоа што не може волјата на родителот да биде посилна од правото на детето да биде здраво, а при тоа не може со една индивидуална постапка да се загрозува и колективното здравје кое е над сѐ“, изјави денеска министерот за здравство Венко Филипче.
„На овој начин не се крати никакво право, заради тоа што најбитно е здравјето на детето и колективното здравје“, рече Филипче, одговарајќи на новинарско прашање за граѓанска иницијатива за донесување закон за изменување на Законот за заштита на населението од заразни болести на 129 граѓани.
Иницијативата денеска не беше разгледана на седницата на собраниската Комисија за политички систем, бидејќи поради немање кворум таа беше одложена и ќе биде закажана, како што беше истакнато, најверојатно на 6 мај или 7 мај по завршувањето на вториот круг од изборите.
