Министерот за здравство Венко Филипче се огласи и на социјалните мрежи по денешната прес-конференција во врска со состојбата со коронавирусот во земјава.
„По подолго време имаме двојно повеќе оздравени пациенти од новодијагностицирани. Да ги почитуваме мерките. Јасно е дека вирусот нема да замине брзо, ама само со одговорно однесување можеме да ја подобриме состојбата. Ви благодарам на сите за поддршката досега“, напиша Филипче на Facebook.
Тој претходно на прес-конференцијата потенцира дека денеска се хоспитализирани 421 пациент – позитивни и суспектни - примени во изминатите 24 часа, а во однос на состојбата со болничките капацитети, истакна дека на Инфективната клиника во изминатите 24 часа се примени пет пациенти, вкупно се хоспитализирани 90 пациенти, на кислородна поддршка се 53 пациенти, а во Клиниката има 20-тина кревети кои се на располагање.
Овој тренд на многу помал број примени пациенти, нагласи Филипче, трае повеќе денови споредено со периодот од пред една недела до десет дена.
„Во болницата во Козле се хоспитализирани 29 возрасни пациенти и четири деца. Во ГОБ ‘8 Септември’ се примени шест нови пациенти, вкупно се хоспитализирани се 122 пациенти, на респираторна машина се тројца пациенти, 88 се потврдени дека се позитивни на вирусот, а за другите се чека резултат. Во болницата во Битола се хоспитализирани 37, а во болницата во Штип се хоспитализирани 45 пациенти. И во двете болници има слободни кревети за следните денови. На инфективните одделенија во Тетово, Охрид, Велес, Куманово, Прилеп и Гостивар се хоспитализирани 94 пациенти и нема одделение во кое нема слободни кревети во овој момент, додаде Филипче.