На денешната заедничка прес-конференција на министерот за здравство Венко Филипче и министерот за образование Арбер Адеми, беа споделени информации за состојбата со COVID-19 во земјава и светот, како и за плановите за почнување на учебната година.
„Во овој момент ситуацијата е стабилна, но ние сепак интензивно се подготвуваме за есенските месеци, кога претпоставуваме, како и многу други земји, дека ситуацијата ќе се комплицира, бидејќи е сезона на респираторни проблеми“, рече министерот Филипче.
Во однос на наставата на училиштата, и покрај тоа што, секако, крајна цел е децата да се вратат во училиште, додека и ние и целиот свет сме соочени со коронавирусот, секако дека децата треба да следат настава. Но треба да бидеме максимално свесни, внимателни, да се намали ризикот од ширење на вирусот, а образовниот процес да биде безбеден за здравјето на децата, наставниот кадар и секако семејствата на децата коишто одат во училиште, рече Филипче.
„Образовниот процес е од неспорно значење, но не смееме да го занемариме здравствениот аспект и можноста за трансмисија на вирусот во училиштата, неколку пати кажавме дека сè може да се надомести, освен здравјето“, нагласи министерот за здравство.
„Имајќи го предвид ова и искуствата од некои други земји, нашата препорака од Комисијата за заразни болести е училиштата да почнат со настава онлајн, со два исклучоци: еден за децата од прво до трето одделение, и тоа имајќи го предвид фактот дека инциденцата кај малите деца е најмала и имаат сосема лесна форма на болеста или се практично асимптоматски носители. Сепак, по барање на родителот, децата од прво до трето одделение ќе може да ја следат наставата целосно и онлајн. По консултациите, решивме да дозволиме да има избор од страна на родителите, а причината е што во одредени семејства има родители коишто се хронично болни, со висок ризик, понатаму децата ги чуваат дома повозрасни членови на семејството како баби и дедовци коишто исто така можно е да имаат хронични болести“, објасни Филипче.
Вториот исклучок е таму каде што во школите или во регионалните училишта има мал број на деца во класот или мал број на класови во училиштата, согласно епидемиолошката состојба да добијат дозвола наставата да ја организираат со физичко присуство.
Прес-конференцијата е во тек.